सभासद आणि परिसरातील शेतकरी बांधवांच्या सर्वांगीण विकासासाठी सतत तत्पर असलेल्या 'नेरपिंगळाई विविध कार्यकारी सहकारी संस्था मर्यादित' या संस्थेला सहकार क्षेत्रातील अतिशय प्रतिष्ठेचा मानला जाणारा "सहकार कृषीरत्न" पुरस्कार देऊन सन्मानित करण्यात आले आहे.

महाराष्ट्र राज्य सहकारी संघ व 'सहकारी महाराष्ट्र' यांच्या संयुक्त विद्यमाने दिनांक ४ जुलै २०२६ रोजी मुंबई येथील यशवंतराव चव्हाण सभागृहात 'सहकार गौरव पुरस्कार' सोहळ्याचे शानदार आयोजन करण्यात आले होते. या सोहळ्यात सहकार व कृषी क्षेत्रात उत्कृष्ट कार्य करणाऱ्या राज्यातील विविध मान्यवर व संस्थांचा गौरव करण्यात आला.

नेरपिंगळाई विविध कार्यकारी सहकारी संस्थेने नेहमीच आपले सभासद व परिसरातील शेतकरी बांधवांच्या हिताला प्राधान्य दिले आहे. कृषी क्षेत्रात संस्थेने राबवलेले नाविन्यपूर्ण उपक्रम आणि केलेल्या उल्लेखनीय कार्याची राज्यपातळीवर विशेष दखल घेण्यात आली. हा पुरस्कार म्हणजे संस्थेच्या पारदर्शक कारभाराची, संचालक मंडळाच्या दूरदृष्टीची आणि सर्व सभासदांनी दाखवलेल्या विश्वासाची मोठी पावती आहे 

दि. ४ जुलै २०२६

महाराष्ट्र शासन 'सहकार भूषण' पुरस्कार प्राप्त नेरपिंगळाई विविध कार्यकारी सहकारी संस्था मर्या. (ता. मोर्शी, जि. अमरावती) तर्फे २९ जून ते ०६ जुलै २०२६ या कालावधीत 'सहकार सप्ताह' आयोजित करण्यात आला आहे.

या सप्ताहात शेतकरी व गावकऱ्यांसाठी वृक्षारोपण, सहकार चौपाल, पिक प्रात्यक्षिके, निविष्ठा वितरण आणि पशुधन चिकित्सा शिबिर असे विविध उपक्रम राबवले जातील. तसेच, महिलांसाठी गोदाम विकास मार्गदर्शन, आरोग्य व कायदेविषयक सल्ला आणि पोषण आहार स्पर्धांचे विशेष आयोजन करण्यात आले आहे.

सविस्तर कार्यक्रमासाठी सोबत जोडलेली ही प्रतिमा पहावी.

उपस्थित सर्व मान्यवरांचे हार्दिक स्वागत!

दी. २९ जून २०२६ 

नेरपिंगळाई विविध कार्यकारी सहकारी संस्था मर्यादित, नेरपिंगळाई यांच्या वतीने ७७ वा प्रजासत्ताक दिन दिनांक सोमवार, २६ जानेवारी २०२६ रोजी संस्थेच्या मुख्यालयात उत्साहात साजरा करण्यात आला.

कार्यक्रमाची सुरुवात ध्वजारोहणाने झाली. यावेळी संस्थेचे संचालक मंडळ, कर्मचारीवर्ग, सभासद तसेच ग्रामस्थ मोठ्या संख्येने उपस्थित होते. ध्वजारोहणानंतर राष्ट्रगीत व देशभक्तीपर गीतांद्वारे देशप्रेमाची भावना व्यक्त करण्यात आली.

कार्यक्रम शांततेत व शिस्तबद्ध पद्धतीने पार पडला. प्रजासत्ताक दिनानिमित्त सर्व उपस्थितांना शुभेच्छा देण्यात आल्या.

दि. २६ जानेवारी २०२६

नेरपिंगळाई विविध कार्यकारी सहकारी संस्था मर्यादित, नेरपिंगळाई यांच्या वतीने तसेच इफको (IFFCO) यांच्या सहकार्याने महिला कृषी कार्यशाळा व हळदी कुंकू कार्यक्रम दिनांक शनिवार, १७ जानेवारी २०२६ रोजी संस्थेच्या मुख्यालयात दुपारी २.०० ते सायंकाळी ६.०० वाजेपर्यंत यशस्वीरीत्या पार पडला.

या कार्यक्रमाला नेरपिंगळाई व परिसरातील महिला सभासदांनी मोठ्या संख्येने उपस्थिती दर्शविली. यानंतर पारंपरिक हळदी कुंकू कार्यक्रमाचे आयोजन करण्यात आले. या कार्यक्रमामुळे महिलांमध्ये आनंद, उत्साह व सामाजिक एकोप्याचे वातावरण निर्माण झाले. उपस्थित महिला भगिनींनी या उपक्रमाचे विशेष कौतुक केले.

या प्रकारच्या उपक्रमांमुळे महिलांमध्ये कृषीविषयक जागरूकता वाढण्यासोबतच सहकारी चळवळ अधिक बळकट होईल, असा विश्वास संस्थेच्या पदाधिकाऱ्यांनी व्यक्त केला. कार्यक्रमाच्या यशस्वी आयोजनासाठी संस्थेचे संचालक मंडळ, कर्मचारीवर्ग तसेच इफको प्रतिनिधी यांनी मोलाचे सहकार्य केले.

दि. १७ जानेवारी २०२६